لیگ نے عالمی سمود فلوٹیلا کی حفاظت کے لئے پارلیمانوں کے سربراہان سے فوری اقدام کی اپیل کی ہے

لیگ آف پارلیمنٹرینز فار القدس اینڈ فلسطین نے دنیا بھر کی پارلیمانوں کے سربراہان سےاپیل کی ہے کہ وہ ”عالمی سمود فلوٹیلا“ میں شامل افراد، خصوصاً مختلف ممالک کے اراکین پارلیمان کی حفاظت کے لئے فوری اور مؤثر اقدامات کریں، جو غزہ کی جانب روانہ ہو رہی ہے۔

یہ فلوٹیلا کئی ممالک کے اراکین پارلیمان پر مشتمل ہے، جن میں لیگ کے اراکین بھی شامل ہیں۔ اس کا مقصد غزہ پر اسرائیلی محاصرے کو توڑنا اور غزہ میں جاری نسل کش جنگ کے خاتمے کا مطالبہ کرنا ہے۔

پارلیمانوں کے سربراہان کے نام اپنے پیغام میں لیگ نے اس تشویش کا اظہار کیا ہے کہ ماضی میں اسرائیل نے انسانی ہمدردی کی بنیاد پر روانہ کی گئی قافلوں اور بیڑوں پر بارہا حملے کئے ہیں۔ لیگ نے خبردار کیا کہ اس مشن میں شامل کسی بھی رکن پارلیمان پر حملہ یا اسے دھمکی دینا نہ صرف ان کے پارلیمانی وقار کی سنگین خلاف ورزی ہوگی بلکہ اس عوامی مینڈیٹ کی بھی توہین ہوگی جس کی وہ نمائندگی کرتے ہیں۔

لیگ نے اس بات پر زور دیا کہ عالمی برادری ان اراکین پارلیمان اور انسانی حقوق کے کارکنوں کی حفاظت کی مکمل ذمہ دار ہے۔ ان کی اس انسانی مشن میں شرکت نہ صرف فلسطینی عوام سے اظہار یکجہتی ہے، بلکہ یہ انسانیت، انصاف، اور اقوام کے حق آزادی و وقار کے دفاع کی علامت بھی ہے۔

لیگ کی ایگزیکٹو کمیٹی کی رکن اور برازیل کی چیمبر آف ڈپٹیز کی رکن، لوزیانے  لنس  نے اعلان کیا ہے کہ وہ بھی ”عالمی سمود فلوٹیلا“ کا حصہ ہوں گی، جو اسرائیلی محاصرے کو توڑنے اور علاقے میں جاری نسل کشی کی جنگ کے خاتمے کا مطالبہ کرنے کے لئے غزہ جا رہی ہے۔