کولمبیا کی پارلیمان نے ریاست فلسطین کے ساتھ پارلیمانی دوستی کمیٹی کے قیام کی منظوری دی

ریپبلک آف کولمبیا کے سینیٹ نے ایک باضابطہ قرارداد کے تحت ریاست فلسطین کے ساتھ پارلیمانی دوستی کمیٹی کے قیام کی منظوری دی ہے۔ یہ قرارداد نمبر 456 کے تحت 14 جولائی 2025 کو جاری کی گئی، جو لیگ آف پارلیمنٹرینز فار القدس اینڈ فلسطین کی ایگزیکٹو کمیٹی کی رکن، سینیٹر کلارا لوپیز اوبریگون کی کوششوں کا نتیجہ ہے۔

یہ قرارداد، جس پر سینیٹ کے صدر سینیٹر ایفریں خوسے سیپیڈا سارابیا اور ان کے دو نائبین نے دستخط کیے، میں کہا گیا ہے کہ اس کمیٹی کا قیام کولمبیا کی پارلیمان کی طرف سے بین الاقوامی تعاون کو فروغ دینے اور دوست پارلیمانوں کے ساتھ روابط قائم کرنے کی کوششوں کا حصہ ہے، خاص طور پر ان مشترکہ چیلنجوں کے پیش نظر جن کا ممالک کو عوامی پالیسیوں اور انسانی حقوق کے میدان میں سامنا ہے۔

یہ نئی دوستی کمیٹی فلسطینی فریق کے ساتھ رابطے اور تعاون کی ذمے دار ہو گی، جس کا مقصد مکالمے کو فروغ دینا، قانون سازی کے تجربات کا تبادلہ کرنا اور امن و انصاف کے قیام کے لیے بین الاقوامی کوششوں کی حمایت کرنا ہے۔اس کمیٹی میں سینیٹ کے 15 ارکان شامل ہوں گے، اور سینیٹر کلارا ایوجینیا لوپیز اوبریگون اس کی سربراہ اور کوآرڈینیٹر مقرر کی گئی ہیں۔

قرارداد میں اس بات کی بھی تصدیق کی گئی ہے کہ کمیٹی کو سینیٹ کے جنرل ڈائریکٹوریٹ کی طرف سے انتظامی معاونت فراہم کی جائے گی، اور وزارت خارجہ اور بوگوٹا میں فلسطینی سفارت خانے کو اس کمیٹی کے قیام کے بارے میں باضابطہ طور پر اطلاع دے دی گئی ہے۔

لیگ آف پارلیمنٹرینز فار القدس اینڈ فلسطین دنیا بھر کی پارلیمانی تنظیموں اور ممالک کی پارلیمانوں میں فلسطین کی موجودگی کو بڑھانے، فلسطینی عوام کی حمایت کرنے اور ان کے ان جائز حقوق کے دفاع کے لئے سرگرم عمل ہے جو بین الاقوامی قانون کی رو سے تسلیم شدہ ہیں۔

سینیٹ کی صدارت کو بھیجے گئے ایک سرکاری خط میں، سینیٹر لوپیز نے اس بات کی تصدیق کی کہ اس اقدام پر تمام شریک ارکان کا اتفاق ہے اور اس کا مقصد ” خاص طور پر موجودہ چیلنجوں کے تناظر میں، فلسطینی عوام کے ساتھ پارلیمانی یکجہتی کے پل تعمیر کرنا اور ان کے جائز مقدمات کا دفاع کرنا ہے۔“