بین الاقوامی فوجداری عدالت کی حمایت میں ہنگری کے نومنتخب وزیر اعظم کے مؤقف کو لیگ کی جانب سے سراہا گیا

لیگ آف پارلیمنٹرینز فار القدس اینڈ فلسطین نے ہنگری کی "ریسپیکٹ اینڈ فریڈم" (TISZA) پارٹی کے رہنما کو عام انتخابات میں کامیابی اور ووٹروں کا اعتماد حاصل کرنے پر مبارک باد دی، اور ان کے لئے نیک خواہشات کا اظہار کیا کہ وہ اپنے ملک کو مزید ترقی اور استحکام کی طرف لے جانے میں کامیاب ہوں۔

لیگ نے ایک سرکاری خط میں ہنگری کے رہنما کی جانب سے اعلان کردہ اس مؤقف کو سراہا، جس میں انہوں نے اپنے ملک کی بین الاقوامی فوجداری عدالت (ICC) سے علیحدگی کی کارروائی روکنے کا عندیہ دیا۔ لیگ نے اس بات کی اہمیت پر زور دیا کہ وہ عدالت کے فیصلوں کا احترام کریں اور اس کے جاری کردہ گرفتاری کے وارنٹس پر عمل درآمد کریں، خصوصاً اُن افراد کے خلاف جاری وارنٹس پر جن پر جنگی جرائم کے ارتکاب کے الزامات ہیں، جن میں اسرائیلی قابض حکومت کے وزیر اعظم سرفہرست ہیں۔

لیگ نے کہا کہ یہ مؤقف بین الاقوامی قانون اور روم اسٹیٹیوٹ کے اصولوں سے واضح وابستگی کو ظاہر کرتا ہے، اور یہ بین الاقوامی نظام انصاف کو مضبوط بنانے کی جانب ایک اہم قدم ہے، خاص طور پر ایسے وقت میں جب دنیا بھر میں سنگین خلاف ورزیاں دیکھی جا رہی ہیں، جن میں فلسطینی عوام کے خلاف کئے جانے والے جرائم نمایاں ہیں۔

لیگ نے نشاندہی کی کہ ہنگری کی نئی سیاسی قیادت کا یہ اعلان ایک نہایت حساس وقت میں سامنے آیا ہے، جب نسل کشی کی جنگ جاری ہے اور خلاف ورزیوں میں مسلسل اضافہ ہو رہا ہے۔ لیگ کے مطابق یہ رجحان ان بین الاقوامی کوششوں کو تقویت دیتا ہے جن کا مقصد سنگین جرائم کے ذمہ دار افراد کو جوابدہ ٹھہرانا اور سزا سے استثنا کی پالیسیوں کا خاتمہ کرنا ہے۔

لیگ نے امید ظاہر کی کہ یہ مؤقف یورپی اور بین الاقوامی سطح پر ایک قابل قلید مثال بنے گا اور مزید ممالک کو ایسی پالیسیاں اپنانے کی ترغیب دے گا ،جو بین الاقوامی انصاف کی حمایت کرتی ہو، جس سے اقوام کے حقوق کے تحفظ اور جرائم کے مرتکبین کے احتساب میں مدد ملے گی۔

آخر میں، لیگ نے ایک بار پھر مبارک باد پیش کرتے ہوئے اس امید کا اظہار کیا کہ ہنگری بین الاقوامی انصاف کے فروغ، بین الاقوامی قانون کے احترام کو مضبوط بنانے، فلسطینی عوام کے حقوق کی حمایت کرنے اور قبضے کے خاتمے کے لئے ایک فعال کردار ادا کرے گا۔