ترکیہ کے صدر رجب طیب ایردوان نے غزہ کے شمال میں واقع جبالیہ پناہ گزین کیمپ کی ایک عمارت میں لگنے والی آگ پر فلسطینی عوام سے تعزیت کا اظہار کیا، جس میں 21 افراد ہلاک اور متعدد زخمی ہوئے ہیں۔

صدر ایردوان نے ٹویٹ کرتے ہوئے کہا کہ ’غزہ میں آتشزدگی کے واقعے میں بچوں سمیت 21 فلسطینی بہن بھائیوں کی وفات پر ہمیں دِلی افسوس ہوا ہے۔ میں، اس افسوسناک واقعے میں وفات پانے والوں کے لئے اللہ سے رحمت و مغفرت  کا امیدوار، سوگوار کنبوں کے لئے صبرِ جمیل اور زخمیوں کی فوری صحت یابی کا متمنی ہوں۔ میں برادر فلسطینی عوام کے ساتھ اظہارِ تعزیت کرتا ہوں۔‘

بتادیں کہ گزشتہ جمعرات کو جبالیہ پناہ گزین کیمپ کی ایک عمارت میں آگ لگی، جہاں رہائشی ایک پارٹی میں شریک تھے۔ جبالیہ اس علاقے کے آٹھ پناہ گزین کیمپوں میں سے ایک ہے، جو 2.3 ملین لوگوں کا گھر ہے اور دنیا کے سب سے زیادہ گنجان آبادی والے مقامات میں سے ایک ہے۔